Loading...

Verse 84:1

إِذَا ٱلسَّمَآءُ ٱنشَقَّتْ

جڏھن آسمان ڦاٽندو.

Verse 84:2

وَأَذِنَتْ لِرَبِّهَا وَحُقَّتْ

۽ پنھنجي پالڻھار جو حُڪم ڪن ڏئي ٻڌندو ۽ (ٻڌڻ) حق اٿس.

Verse 84:3

وَإِذَا ٱلْأَرْضُ مُدَّتْ

۽ جڏھن زمين پکيڙبي.

Verse 84:4

وَأَلْقَتْ مَا فِيهَا وَتَخَلَّتْ

۽ جيڪي اُن ۾ ھوندو سو (سڀ) ڪڍي اُڇليندي ۽ خالي ٿيندي.

Verse 84:5

وَأَذِنَتْ لِرَبِّهَا وَحُقَّتْ

۽ پنھنجي پالڻھار جو حُڪم ڪن ڏئي ٻڌندي ۽ (ٻڌڻ) حق اٿس.

Verse 84:6

يَـٰٓأَيُّهَا ٱلْإِنسَـٰنُ إِنَّكَ كَادِحٌ إِلَىٰ رَبِّكَ كَدْحًا فَمُلَـٰقِيهِ

اي ماڻھو تون پنھنجي پالڻھار ڏانھن (پھچڻ ۾) تمام گھڻي تڪليف وٺڻ وارو آھين جو اُن کي (وڃي) ملندين.

Verse 84:7

فَأَمَّا مَنْ أُوتِىَ كِتَـٰبَهُۥ بِيَمِينِهِۦ

پوءِ اُھو (ماڻھو) جنھن کي سندس سڄي ھٿ ۾ سندس اعمالنامو ڏبو.

Verse 84:8

فَسَوْفَ يُحَاسَبُ حِسَابًا يَسِيرًا

تنھن سان آسانيءَ طرح سگھوئي حساب ڪبو.

Verse 84:9

وَيَنقَلِبُ إِلَىٰٓ أَهْلِهِۦ مَسْرُورًا

۽ پنھنجن گھر وارن ڏانھن خوش ٿي موٽندو.

Verse 84:10

وَأَمَّا مَنْ أُوتِىَ كِتَـٰبَهُۥ وَرَآءَ ظَهْرِهِۦ

۽ اُھو ماڻھو جنھن کي سندس اعمالنامو سندس پٺي پويان ڏبو.

Verse 84:11

فَسَوْفَ يَدْعُوا۟ ثُبُورًا

سو سگھوئي موت کي سڏيندو.

Verse 84:12

وَيَصْلَىٰ سَعِيرًا

۽ دوزخ ۾ گھڙندو.

Verse 84:13

إِنَّهُۥ كَانَ فِىٓ أَهْلِهِۦ مَسْرُورًا

ڇوته اُھو (دنيا ۾) پنھنجن گھر وارن ۾ خوش (حال) ھو.

Verse 84:14

إِنَّهُۥ ظَنَّ أَن لَّن يَحُورَ

بيشڪ انھيءَ ڀانيو ھو ته (الله ڏانھن) ڪڏھن نه موٽندو.

Verse 84:15

بَلَىٰٓ إِنَّ رَبَّهُۥ كَانَ بِهِۦ بَصِيرًا

ھائو! (موٽندو) ڇوته سندس پالڻھار اُن کي ڏسندڙ آھي.

Verse 84:16

فَلَآ أُقْسِمُ بِٱلشَّفَقِ

پوءِ شفق جو قسم کڻان ٿو.

Verse 84:17

وَٱلَّيْلِ وَمَا وَسَقَ

۽ رات جو (قسم) ۽ جنھن کي گڏ ڪيو اٿس.

Verse 84:18

وَٱلْقَمَرِ إِذَا ٱتَّسَقَ

۽ چنڊ جو (قسم) جڏھن پورو روشن ٿئي.

Verse 84:19

لَتَرْكَبُنَّ طَبَقًا عَن طَبَقٍ

ته ھڪ حال کان ٻئي حال تي ضرور چڙھندؤ.

Verse 84:20

فَمَا لَهُمْ لَا يُؤْمِنُونَ

پوءِ ھنن (ڪافرن) کي ڇا (ٿيو) آھي جو ايمان نه آڻيندا آھن.

Verse 84:21

وَإِذَا قُرِئَ عَلَيْهِمُ ٱلْقُرْءَانُ لَا يَسْجُدُونَ ۩

۽ جڏھن وٽن قرآن پڙھبو آھي (ته) سجدو نه ڪندا آھن.

Verse 84:22

بَلِ ٱلَّذِينَ كَفَرُوا۟ يُكَذِّبُونَ

بلڪ (اھي) ڪافر ڪوڙ ڀانئيندا آھن.

Verse 84:23

وَٱللَّهُ أَعْلَمُ بِمَا يُوعُونَ

۽ جيڪي (پنھنجين دلين ۾) سانڀيندا آھن سو الله چڱي طرح ڄاڻندڙ آھي.

Verse 84:24

فَبَشِّرْهُم بِعَذَابٍ أَلِيمٍ

پوءِ کين ڏکوئيندڙ عذاب جي خبر ڏي.

Verse 84:25

إِلَّا ٱلَّذِينَ ءَامَنُوا۟ وَعَمِلُوا۟ ٱلصَّـٰلِحَـٰتِ لَهُمْ أَجْرٌ غَيْرُ مَمْنُونٍۭ

پر جن ايمان آندو ۽ چڱا ڪم ڪيا تن لاءِ اَڻ کُٽ اَجر آھي.